ملک کے بالائی علاقوں کے علاوہ سندھ کے کئی علاقوں میں شدید سردی اور شدید دھند چھائی ہوئی ہے۔ پنجاب اور خیبر پختونخوا میں صورتحال زیادہ پریشان کن ہے۔
شدید دھند کے باعث حد نگاہ کم ہونے کے باعث موٹروے ایم فائیو کو شیرشاہ سے ظاہر پیر تک بند کردیا گیا ہے۔
شدید سردی اور دھند کی وجہ سے معمولات زندگی بری طرح متاثر ہوئے ہیں۔ ہفتہ کی صبح بھی پنجاب بھر کے بیشتر علاقے شدید دھند کی لپیٹ میں رہے۔
کئی شہروں میں معمول کی معاشی اور سماجی سرگرمیاں بری طرح متاثر ہوئی ہیں۔ چھوٹے قصبوں کے لوگ جو قریبی بڑے شہروں میں کام کرنے جاتے ہیں انہیں بھی شدید مشکلات کا سامنا کرنا پڑ رہا ہے کیونکہ ان کے لئے روزمرہ کا سفر مشکل ہو گیا ہے۔
دھند سے متاثرہ شہروں کی انتظامیہ نے لوگوں کو غیر ضروری سفر سے گریز کرنے کا مشورہ دیا ہے۔ شدید دھند کی وجہ سے پروازوں کا شیڈول بھی متاثر ہوا ہے۔ کئی پروازیں منسوخ کر دی گئی ہیں۔
سرد ترین علاقوں میں لوگوں کو توانائی کے بحران کی وجہ سے اضافی مسائل کا سامنا کرنا پڑتا ہے۔ بجلی کی لوڈ شیڈنگ کی وجہ سے لوگ کمرے کو گرم رکھنے کے لیے لکڑیاں جلانے پر مجبور ہیں۔