سابق گورنر پنجاب عمر سرفراز چیمہ گرفتار.لاہور-اینٹی کرپشن پنجاب نے سابق گورنر پنجاب عمر سرفراز چیمہ کو گرفتار کرلیا۔
اینٹی کرپشن حکام کے مطابق تحریک انصاف کے رہنما عمر سرفراز چیمہ کو صبح سویرے ان کی رہائش گاہ سے گرفتار کیا گیا۔
عمر سرفراز چیمہ پر بطور گورنر اپنے اختیارات کا غلط استعمال کرنے اور فیملی رجسٹریشن سرٹیفکیٹ میں جعل سازی کرکے اپنی بہن کو حصہ دینے کا الزام ہے۔
پی ٹی آئی رہنما کے اہل خانہ کے مطابق سادہ کپڑوں میں ملبوس نامعلوم افراد نے عمر چیمہ کو حراست میں لے لیا۔ اہل خانہ کا کہنا ہے کہ انہوں نے یہ نہیں بتایا کہ انہوں نے عمر چیمہ کو کن الزامات پر حراست میں لیا ہے۔
اسلام آباد ہائی کورٹ کے احاطے سے عمران خان کی گرفتاری کے بعد پاکستان بھر میں احتجاجی مظاہرے شروع ہوگئے جہاں وہ دو مقدمات میں بائیو میٹرک تصدیق کے لیے موجود تھے۔
اس سے قبل پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کی گرفتاری کے بعد احتجاج کے دوران توڑ پھوڑ کرنے پر پاکستان تحریک انصاف (پی ٹی آئی) کے متعدد رہنماؤں کے خلاف مقدمات درج کیے گئے تھے۔