بلاول بھٹو کا بھارت سے 2019 کے اقدامات پر نظر ثانی کا مطالبہ.وزیر خارجہ بلاول بھٹو زرداری نے کہا ہے کہ پاکستان کے ساتھ مذاکرات کے لیے سازگار ماحول پیدا کرنے کی گیند بھارت کے پالے میں ہے۔
بھارتی ریاست گوا میں شنگھائی تعاون تنظیم (ایس سی او) کے اجلاس کے موقع پر برطانوی نشریاتی ادارے بی بی سی کو دیے گئے ایک انٹرویو میں بھٹو نے اس بات پر زور دیا کہ پاکستان کا مؤقف بھارت کی جانب سے اگست 2019 میں اٹھائے گئے سنجیدہ اقدامات کو واپس لینے پر منحصر ہے۔
انہوں نے کہا کہ جب تک یہ قدم نہیں اٹھایا جاتا اس وقت تک دوطرفہ بات چیت مشکل رہے گی۔ انہوں نے کہا کہ جب تک بھارت 2019 کے اقدامات کا جائزہ نہیں لیتا تب تک بامعنی اور دوطرفہ بات چیت مشکل ہے۔
بلاول بھٹو کا دورہ بھارت ایک دہائی میں کسی پاکستانی وزیر خارجہ کا دہلی کا پہلا دورہ ہے اور اس نے دونوں ممالک میں میڈیا کی بہت توجہ حاصل کی ہے۔ جوہری صلاحیت رکھنے والے دونوں ممالک تین جنگیں لڑ چکے ہیں، ان کے تعلقات سرد مہری کا شکار ہیں اور انہوں نے اپنے سفارتی تعلقات کو کم کر دیا ہے۔
وزیر خارجہ
وزیر خارجہ نے کہا کہ مذاکرات کے لیے سازگار ماحول پیدا کرنے کی ذمہ داری بھارت پر عائد ہوتی ہے، 2019 میں بھارت کے غیر قانونی طور پر مقبوضہ جموں و کشمیر کی خصوصی حیثیت ختم کرنے کے فیصلے نے ہمسایہ ممالک کے درمیان مذاکرات کے ماحول کو کمزور کردیا۔
بھارت میں شنگھائی تعاون تنظیم کی کانفرنس میں ان کی موجودگی کے بارے میں پوچھے جانے پر بلاول بھٹو زرداری نے کہا کہ ان کی جسمانی موجودگی شنگھائی تعاون تنظیم کے فورم کے لیے پاکستان کے احترام کا واضح پیغام دیتی ہے۔ تاہم انہوں نے واضح کیا کہ اگرچہ بقیہ واقعات تکنیکی طور پر شنگھائی تعاون تنظیم کا حصہ ہیں لیکن وہ وزرائے خارجہ کی کونسل اور سربراہان مملکت کے اجلاسوں کی طرح باضابطہ نہیں ہیں۔
انہوں نے کہا کہ پاکستان کے وزیر خارجہ کے لئے یہ ضروری ہے کہ وہ اس اہم فورم پر ملک کی نمائندگی کریں اور ملک کا موقف واضح کریں۔
بھٹو نے اس بات پر زور دیا کہ کشمیر اور دوطرفہ تعلقات پر پاکستان کے موقف میں کوئی تبدیلی نہیں آئی ہے۔ انہوں نے زور دے کر کہا کہ ان کا ملک ان مسائل کو پرامن مذاکرات کے ذریعے حل کرنے کے لئے پرعزم ہے اور انہوں نے ہندوستان پر زور دیا کہ وہ اس عزم کا جواب دے۔